الکحل والی دواکا استعمال

بسم اللہ الرحمن الرحیم 

-----------------------------------------------------------

دراصل یہ مضمون حضرت مولانا ابرار صاحب قاسمی دامت بر کاتھم کی ہے ،مولانانے اس اہم مضمون کو اپنے واٹس ایپ پر شائع کیا تھا ،اور واٹس ایپ پراپلوڈ مضمون کی حیات بہت ہی کم ہوتی  ہے ،نیز اس سے استفادہ بھی محدود حضرات ہی کر سکتے ہیں، اسلئے مولانا ہی کی اجازت سے افادہ عام کے پیش نظر اضافہ یسیر کے ساتھ اپنے بلاگ کی مدد سے شائع کر رہا ہوں،اللہ تعالیٰ اس کے افادہ و استفادہ کو عام تام فر مائے آمین ،

-------------------------------------------------------------

کیا الکحل والی دواؤں یا پرفیوم میں کا استعمال کرنا جائز ہے؟

?Alcohol is permissible in medicine or perfume

  الکحل (Alcohol) ایک Chemical Composition یعنی ایک فارمولہ ہے جو ہیدروکسل Hydroxyl (-OH) سے بنتا ہے، جس میں نشہ ہوتا ہے۔ قرآن وحدیث کی روشنی میں پوری امت مسلمہ کا اتفاق ہے کہ شراب (جس کو عربی میں خمر اور انگریزی میں Wine کہتے ہیں) کا پینا حرام ہے خواہ مقدار میں کم ہی کیوں نہ ہو۔ پہلے شراب عموماً بعض چیزوں مثلاً انگور کو سڑاکر بنائی جاتی تھی جس کو دیسی شراب کہتے ہیں۔ اب نئی ٹکنولوجی کے ذریعہ بھی شراب تیار ہوتی ہے، جس کو انگریزی شراب کہتے ہیں۔ لیکن شرعی اعتبار سے دونوں کا ایک ہی حکم ہے کہ ہر وہ چیز جو نشہ پیدا کرے اس کا پینا یا اس کا کاروبار کرنا یا ایسی کمپنی کا شی خریدنا یا اس میں ملازمت کرنا جو شراب بناتی ہیں، سب حرام ہے۔ بعض حضرات جو شراب پینے کے عادی بن جاتے ہیں اُن کو تھوڑی مقدار میں شراب نشہ نہیں کرتی، اس کے متعلق قرآن وحدیث کی روشنی میں علماء کرام نے وضاحت کی ہے کہ اگر کوئی شخص پہلی مرتبہ کوئی چیز پئے اور اس سے نشہ ہو تو وہ  شراب کے حکم میں ہے۔

شراب پینے کے بعض فوائد ہوسکتے ہیں لیکن مجموعی طور پر شراب پینے میں نقصانات بہت زیادہ ہیں، جیساکہ ہم اپنی آنکھوں سے ایسے لوگوں کے احوال دیکھتے ہیں جو شراب پینے کے عادی بن جاتے ہیں۔ نیز جس ذات نے انس وجن اور ساری کائنات کو پیدا کیا ہے، اس نے شراب پینے سے تمام انسانوں کو منع کیا ہے، یعنی شراب پینے میں اللہ تعالیٰ کی نافرمانی ہے۔ نیز شراب پینا انسان کو ہلاک کرنے والے سات بڑے گناہوں میں سے ایک ہے۔

الکحل ملی دواؤں کا حکم

اب بعض انگریزی دواؤں خاص کر Life Saving Drugs میں دواؤں کی حفاظت یا بعض بیماریوں کے علاج کے لئے نئی ٹکنولوجی کے ذریعہ تیار کردہ الکحل (Alcohol) ملایا جاتا ہے، مثلاً سانس کی زیادہ تر دواؤں میں الکحل ہوتا ہے۔ ہومیوپیتھی (Homeopathy) کی اکثر دواؤں میں بھی الکحل کا استعمال ہوتا ہے، جو پینے والی شراب سے تھوڑا مختلف ہوتا ہے۔ اسی طرح پرفیوم (Perfume ) میں بھی الکحل کا استعمال ہوتا ہے۔ اب سوال یہ ہے کہ ایسی دوائیں (Medicines) یا پرفیوم (Perfume) جن میں میں الکحل (Alcohol) ہوتا ہے، کیا ان کا استعمال کرنا جائز ہے یا نہیں؟ علماء کرام نے تحریر کیا ہے کہ اگر ایسی دواؤں سے بچنا ممکن ہے جن میں الکحل ہے یعنی ان کا متبادل مارکیٹ میں موجود ہے تو استعمال نہ کریں، ورنہ ایسی دوائیں استعمال کی جاسکتی ہیں جن میں الکحل (Alcohol) موجود ہے، کیونکہ وہ مقدار میں بہت ہی کم ہوتا ہے، اور وہ پینے والے الکحل سے تھوڑا مختلف بھی ہوتا ہے جیساکہ ماہرین سے معلوم کیا گیا، نیز اُس کا پینا مقصود نہیں ہوتا اور نہ ہی ان سے نشہ آتا ہے۔ اسی طرح وہ الکحل (Alcohol) والی دوائیں بھی استعمال کی جاسکتی ہیں جو بدن کی صفائی وغیرہ کے لئے استعمال کی جاتی ہیں مثلاً انجکشن لگانے سے قبل اور بعد میں، نیز خون نکالنے سے قبل یا بعد میں، جو سیکنڈوں میں اڑ جاتا ہے۔
(وَأَمَّا مَا هُوَ حَلَالٌ عِنْدَ عَامَّةِ الْعُلَمَاءِ) فَهُوَ الطِّلَاءُ، وَهُوَ الْمُثَلَّثُ وَنَبِيذُ التَّمْرِ وَالزَّبِيبُ فَهُوَ حَلَالٌ شُرْبُهُ مَا دُونَ السَّكَرِ لِاسْتِمْرَاءِ الطَّعَامِ وَالتَّدَاوِي وَلِلتَّقْوَى عَلَى طَاعَةِ اللَّهِ تَعَالَى لَا لِلتَّلَهِّي وَالْمُسْكِرُ مِنْهُ حَرَامٌ، وَهُوَ الْقَدْرُ الَّذِي يُسْكِرُ، وَهُوَ قَوْلُ الْعَامَّةِ،(الفتاویٰ الھندیہ ،كِتَابُ الْأَشْرِبَةِ،الْبَاب الْأَوَّل فِي تَفْسِير الْأَشْرِبَة وَالْأَعْيَان الَّتِي تَتَّخِذ مِنْهَا الْأَشْرِبَة)

(ہومیو پیت دواؤں کا استعمال)

ہومیوپیتھی (Homeopathy) کی اکثر دواؤں کی استقامت اور اس کی حفاظت کے لئے بھی الکحل (Alcohol) کا استعمال ہوتا ہے، لیکن وہ مقدار میں بہت ہی کم ہوتا ہے۔ ہومیوپیتھی دوائیں چند قطروں پر ہی مشتمل ہوتی ہے جو چینی، پانی اور دودھ سے بنے Pills میں ڈالی جاتی ہے ۔ اُن چند قطروں میں بہت معمولی مقدار میں وہ الکحل (Alcohol) ہوتا ہے جو پینے والے الکحل سے بہت زیادہ ہلکا ہوتا ہے، جیسا کہ ماہرین سے معلوم کیا گیا۔ اس لئے علماء کرام نے کہا کہ ہومیوپیتھی دوائیں استعمال کی جاسکتی ہیں۔
(حوالہ بالا کے ساتھ دیکھیں احسن الفتاویٰ۸: ۴۸۸،احسن الفتاویٰ میں علامہ شبلی ،علامہ شامی ابن عابدین ،علامہ گنگوہی اورفتاویٰ عالمگیری کے حوالے سے مفصل کلام کیا گیا ہے )

پرفیوم (Perfume)

رہا معاملہ پرفیوم (Perfume) کا، تو پرفیوم کے استعمال سے بچنا ممکن ہے،لہٰذا ایسے پرفیوم کے استعمال سے بچنا ہی بہتر ہے جن میں نئی ٹکنولوجی کے ذریعہ تیار کردہ الکحل (Alcohol) ہوتا ہے، کیونکہ بغیر الکحل والے عطر بڑی مقدار میں آسانی سے ہر جگہ مل جاتے ہیں۔ ہاں علماء نے تحریر کیا ہے کہ پرفیوم (Perfume) میں استعمال ہونے والے الکحل، جو Hydroxyl (-OH) سے بنتا ہے، کی حرمت واضح طور پر قرآن وحدیث میں موجود نہیں ہے، علماء کرام کا اجتہاد ہے، نیز الکحل والے پرفیوم (Perfume) کا استعمال بہت عام ہوگیا ہے جسے عموم بلوا کہا جاتا ہے، لہٰذا الکحل والے پرفیوم (Perfume) کا استعمال کرنا حرام تو نہیں ہے، لیکن بچا جائے تو بہتر ہے.

(فتاویٰ النوزل 16: 153،اور دیکھیں مکمل تفصیل کتاب الفتاویٰ جلد نمبر 6)

اس سلسلے میں مزید تفصیلی کلام پڑھنے کیلئے نیچے لنک پر کلک کریں
پتنجلی کی چیزیں حرام ہیں

حرام کھانا

بسم اللہ الرحمن الرحیم

لقمہ حرام

      جس طرح نصوص قطعیہ سے یہ ثابت ہے کہ حلا ل وپاکیزہ کسب معاش فرض ہے اسی طرح قرآن واحادیث سے یہ بات بھی ثابت ہے کہ حرام کمائی سے بچنا فرض ہے،بلکہ بعض حضرات کیلئے حلال کمائی ضروری بھی نہیں ہے لیکن حرام کمائی سے بچنا تو ہر ایک کے لئے ضروری ہے اس میں کسی کا بھی استثناء نہیں،حرا م مال کا ایک لقمہ بھی جہنم میں لے جانے کیلئے کافی ہے ؛اس لئے نہایت ضروری ہے کہ اسباب معیشت اور پیشہ اختیار کرتے وقت شریعت کے نقطہ نظر سے جانچ لے کہ وہ پیشہ حرام ہے یا حلال ؟

(آپ ﷺ کی پیشین گوئی)

آپ ﷺ کا ارشاد ہے:

عن أبي هريرةرضي الله عنه أن رسول الله صلى الله عليه وسلم قال يأتي على الناس زمان لا يبالي المرء ما أخذ منه، أمن الحلال أم الحرام؛ (رواه البخاري.(

کہ حضرت ابو ہریرہؓ سے روایت ہے کہ آپ ﷺ نے فرمایا:کہ لوگوں پر ایک ایسا زمانہ آئیگا جس میں انسان نہیں غور وفکر کریگا کہ وہ کہاں سے اور کس طرح مال کما رہا ہے،حلال طریقے سے یا حرام طریقے سے؟
اس حدیث پاک میں جس زمانے کی پیشین گوئی کی گئی ہے ،وہ یہی زمانہ ہے آج اس مادیاتی دور میں ہر کوئی کسب معاش میں لگا ہواہے،ایک گھر کے تین تین چار چار اشخاص روزی کمانے میں لگے ہوئے ہیں،اور ان میں سے کسی کو یہ فکر نہیں ہے کہ جس طرح ہم روزی کمارہے ہیں کیا وہ طریقہ شریعت کے نقطہ نظرسے جائز بھی ہے یا حرام؟ نہ تو باپ بیٹے سے پوچھتا ہے،اورنہ بیٹا باپ سے کہ آپ صبح سے شام تک جو کام کر کے کے گھر میں روپیے لاتے ہیں کیا وہ کا م جائزبھی ہے؟یاد رکھیں حرام مال کا استعمال کرنا تو حرام ہے ہی اس کی سزا قیامت کے دن جہنم ہے۔

(حرام کھانے والا جہنم میں)

حضرت ابو بکر صدیق ؓ سے روایت ہے، کہ نبی رحمت ﷺنے ارشاد فرمایا: اللہ تعالیٰ نے اُس جسم پر جنت حرام فرما دی ہے جو حرام غذا سے پلا بڑھا ہو۔(کنز العمال، کتاب البیوع، قسم الاقوال، الفصل الاول فی فضائل کسب الحلال)

حضرت سیّدناعبداللہ بن عمرؓ سے روایت ہے کہ آپ ﷺنے ارشاد فرمایا:جس نے دنیا میں حرام طریقے سے مال کمایا اور اسے ناحق جگہ خرچ کیا تو اللہ تعالیٰ اسے ذلت و حقارت کے گھر (یعنی جہنم)میں داخل کردے گا(شعب الایمان، الثامن والثلاثون من شعب الایمان، ۴/۶۹۳، حدیث: ۷۲۵۵)

وَعَن جَابر بن عبد الله رَضِي الله عَنْهُمَا أَن النَّبِي صلى الله عَلَيْهِ وَسلم قَالَ يَا كَعْب بن عجْرَة إِنَّه لَا يدْخل الْجنَّة لحم نبت من سحت، (الترغیب والترھیب کتاب البیوع، الحدیث۲۶۷۸)

حضرت جابر بن عبد اللہ ؓ سے روایت ہے کہ نبی رحمت ﷺ نے فر مایا اے کعب بن عجرہ(غور سے سنو ) جس گوشت (جسم ) کی پرورش حرام مال سے ہوگی وہ جنت میں داخل نہیں ہوگا،

(حرام مال کی نحوست)

حضرت عبداللہ بن مسعودؓ سے ایک طویل روایت میں ہے،نبی رحمت ﷺ نےارشاد فرمایا: ’’جو بندہ مالِ حرام حاصل کرتا ہے، اگر اُس کو صدقہ کرے تو مقبول نہیں اور خرچ کرے تو اُس کے لیے اُ س میں برکت نہیں اور اپنے بعد چھوڑ کر مرے تو جہنم میں جانے کا سامان ہے۔ اللہ تعالیٰ برائی سے برائی کو نہیں مٹاتا، ہاں نیکی سے برائی کو مٹا دیتا ہے۔ بے شک خبیث کو خبیث نہیں مٹاتا۔(مسند امام احمد، مسند عبد اللہ بن مسعود رضی اللہ تعالی عنہ، الحدیث: ۲۷۶۳)

(لقمہ حرام کی وجہ سے کوئی عمل قبول نہیں)

حضرت سعد بن وقاص کی روایت میں ہے، ’’وَالَّذِي نفس مُحَمَّد بِيَدِهِ إِن العَبْدليقذف اللُّقْمَة الْحَرَام فِي جَوْفه مَا يتَقَبَّل مِنْهُ عمل أَرْبَعِينَ يَوْمًا۔۔۔۔۔۔(الترغیب والترھیب کتاب البیوع، الحدیث ۲۶۶۴)

آپﷺ فرماتے ہیں کہ قسم ہے اس ذات کی جس کے قبضہ قدرت میں محمد (ﷺ) کی جان ہے کہ جب کوئی بندہ حرام لقمہ اپنے پیٹ میں ڈالتا ہے تو اسکی چالیس دن تک کوئی عمل قبول  نہیں کیا جاتا ،

وَرُوِيَ عَن ابْن عمر رَضِي الله عَنْهُمَا قَالَ من اشْترى ثوبا بِعشْرَة دَرَاهِم وَفِيه دِرْهَم من حرَام لم يقبل الله عز وَجل لَهُ صَلَاة مَا دَامَ عَلَيْهِ (الترغیب والترھیب کتاب البیوع، الحدیث ۲۶۶۶)

حضرت ابن عمر سے مروی ہے کہ جس نے دس درہم میں کوئی کپڑاخریدا اس میں ایک درہم حرام کا تھا (تو اس حرام درہم کی وجہ سے ) اللہ تعالیٰ اسکی کوئی نمازاس وقت تک قبول نہیں کریں گے جب تک وہ کپڑا اس کے پدن پر رہیگا،

حضرت ابن عباس رضی اللہ تعالیٰ عنہما کا قول ہے: ایسے شخص کی اللہ تبارک و تعالیٰ نماز قبول نہیں فرماتا جس کے پیٹ میں حرام موجود ہو، تاوقتیکہ اللہ تبارک و تعالیٰ کی بارگاہ میں سچے دل سے توبہ نہ کرلے۔

مُکاشَفَۃُ الْقُلوب میں ہے:آدَمی کے پیٹ میں جب حرام لقمہ پڑا تو زمین و آسمان کا ہر فرشتہ اُس پر لعنت کرتاہے جب تک (حرام لقمہ )اس کے پیٹ میں رہے گا اور اگر اسی حالت میں(یعنی پیٹ میں حرام لقمے کی موجودگی میں)موت آ گئی تو جہنم میں داخل ہو گا،(مکاشَفَۃُ القُلوب،الباب الاول فی بیان الخوف،)

جب اس قدر حرام کے ایک لقمہ پر پکڑ ہے تو ہر مسلمان کیلئے، پیشہ، ملازمت، معیشت وتجارت سے پہلے ضروری ہی نہیں بلکہ فرض بھی ہےکہ وہ اس کی تحقیق کرلیں کہ وہ جس کام کو کرنے جارہاہے کیا شریعت کی نگا ہ میں وہ جائز بھی ہے یانہیں؟

اب تک تو وہ باتیں تھیں جس کو حرام صریح کہتے ہیں،اور ان سے بچنا فرض ہے ،اسی کے ساتھ شریعت کا مطالبہ مشتبہ امور کو بھی چھوڑ دینے کا ہے خواہ وہ مشتبہ لقمہ ہو یا اور کوئی چیز ارشاد نبی ﷺ ہے ،

(مشتبہ امور سے بچنا بھی ضروری ہے )

حضرت نعمان بن بشیر رضی اللہ تعالیٰ عنہ سے روایت ہے کہ رسول اللہ صلی اللہ علیہ واٰلہ وسلم نے ارشاد فرمایا:’’کہ حلال ظاہر ہے حرام ظاہر ہے اور ان دونوں کے درمیان مشتبہ چیزیں ہیں جن کو بہت سے لوگ نہیں جانتے  لہذا جس شخص نے مشتبہ چیزوں سے پرہیزکیا اس نے اپنے دین اور اپنی عزت کو پاک ومحفوظ کرلیا (یعنی مشبہ امور سے بچنے والے کے ایمان کی یقناًمحفوظ ہے) اور جو شخص مشتبہ چیزوں میں مبتلاء ہوا وہ حرام میں مبتلاء ہوگیا اور اس کی مثال اس چروا ہے کی سی ہے جو ممنوعہ چراگاہ کے آس پاس چراتا  ہے ہر وقت اس کا امکان رہتا ہے کہ اس کے جانور اس ممنوعہ چرا گاہ  میں گھس کر چرنے لگیں… جان لوکہ ہر باد شاہ کی ممنوعہ چرا گاہ ہوتی ہے اور یا رکھو! کی اللہ تعالیٰ کی ممنوعہ چرا گاہ حرام چیزیں ہیں… اور اس بات کو بھی ملحوظ رکھو! کہ انسان کے جسم میں گوشت کا ایک ٹکرا ہے جب وہ درست حالت میں رہتا ہے ، تو پورا جسم درست حالت میں رہتا ہے اور جب اس ٹکرے میں بگاڑ پیدا ہوجاتا ہے تو پورا جسم بگڑ جاتا ہے… یاد رکھو! گوشت کا وہ ٹکرا دل ہے‘‘۔ (بخاری ومسلم)

وَعَن النواس بن سمْعَان رَضِي الله عَنهُ عَن النَّبِي صلى الله عَلَيْهِ وَسلم قَالَ الْبر حسن الْخلق وَالْإِثْم مَا حاك فِي صدرك وكرهت أَن يطلع عَلَيْهِ النَّاس

(رَوَاهُ مُسلم)

حضرت نواس بن سمعان ؓ سے روایت کہ نبی رحمت ﷺ نے فرمایا نیکی اچھے اخلاق کو اور گناہ دل میں کھٹکنے والی چیز کو کہتے ہیں جس پر دوسروں کا مطلع ہو نا تم بر ا سمجھو،

اللہ تعالی پو ری امت مسلمہ کوحرام اور مشتبہ امور سے حفاظت فرمائے آمین

ا س سےملتے جلتے عمدہ اور مدلل مضمون

معیشت وتجارت کی فضیلت

تجارت حلال یا حرام

میلاکا شرعی حکم

ملک بھارت کے سلگتے مسائل

سول کوڈ 

یکساں سول کوڈ

سول کوڈ اور ملک بھارت 

طلاق اور موجودہ حکومت

پتنجلی کی چیزیں حرام ہیں