عورت کا مقام

برطانیہ میں تو ماضی قریب تک لڑکی شادی ہونے کے بعد اپنی ہستی کھودیتی تھی، قانون کے مطابق وہ کسی جائیداد  کی مالک نہیں بن سکتی تھی، یہانتک کہ بیوی کی کمائی اور تنخواہ بھی خاوند کی ہوجاتی تھی، قانونی نظریہ یہ تھا کہ شادی کے بعد عورت کی اپنی کوئی شخصیت نہیں رہتی بلکہ خاوند میں مدغم ہوجاتی ہے، اسی لئے آج بھی برطانیہ میں یہ رواج ہے کہ شادی کے بعد بیوی خاوند کا نام اپنا لیتی ہے جیسے مسز ابراہم، مسز بارکلے اور مسز انتھونی وغیرہ۔

برطانیہ کے ولی عہد شہزادہ چارلس آکسفورڈ کے اسلامی سینٹر میں تقریر کرتے ہوئے اس کا اعتراف کرچکے ہیں کہ ’’چند دہائی قبل تک میری دادی کو بھی جو حقوق حاصل نہیں تھے، اسلام چودہ سال پہلے وہ تمام حقوق عورتوں کو عطا کرچکا ہے‘‘۔

مغربی ممالک میں زمانہ قدیم سے عورت زبوں حالی اورپائمالی کا شکار رہی ہے اسے تیسرے درجہ سے بھی کمتر سمجھا جاتا تھا، ایسا کھلونا جس سے جب جی چاہا کھیلا اور دل بھر گیا تو پھینک دیا، اپنا حق مانگنا تو دور، اپنے اوپر ظلم وستم کے خلاف آواز اٹھانے کی بھی اسے اجازت نہیں تھی۔ اگر یوروپ کی تاریخ پر نظر ڈالی جائے تو وہاں کے معاشرہ میں عورت کو کوئی مقام ومرتبہ حاصل نہ تھا، مسیحی کلیسا نے تو عورت کو گناہِ آدم کا مجرم قرار دیکر عزت واحترام کا مقام دینے سے انکار کردیا تھا، حضرت عیسیٰ مسیحؑ نے شادی نہیں کی اس لئے عیسائی معاشرہ میں عائلی اسوہ موجود نہیں ہے تورات میں عورتوں کے حقوق کے بارے میں کوئی واضح ہدایت نہیں ملتی لہذا مسیحیت عورتوں کے تعلق سے کلیسائی رویہ کے تابع رہی ہے، یہانتک کہ کلیسا کے ذمہ داروں کیلئے تجرد کو لازمی سمجھا گیا، چنانچہ کلیسا میں مرد اور عورت دونوں ایک غیر فطری مجرد زندگی گزارنے لگے،جس سے سنگین مسائل پیدا ہوئے ان کی خانقاہوں میں جنسی بے راہ روی اتنی بڑھی کہ اس کے واقعات ہر خاص وعام کی زبان پر آگئے، وقت کے ساتھ کلیسا میں بھی تبدیلیاں آئیں لیکن مغربی معاشرہ میں آج بھی عورت صرف ایک جنسی کھلونا ہے، عورت کی آزادی کے نام نہاد نعروں کے ساتھ اسے نائٹ کلب، شراب خانے، فلم اور ٹی وی ہر جگہ نیم عریاں بلکہ برہنہ کرکے پیش کیا جارہا ہے۔

یہی حال ہندوستان کا رہا کہ یہاں صنفِ نازک مرد کے مقابلہ میں نہایت ذلیل وخوار تھی، مرد خدا تھا، معبود تھا، آقا تھا اور عورت محض ایک داسی، جس کا اپنا کوئی وجود تھا، نہ رائے اور نہ پسند، ساری زندگی وہ مرد کی خدمت کرتی اور اس کے مرنے کے بعد، اسی کے ساتھ زندہ جلا دی جاتی جسے ’’ستی‘‘ کی رسم کہتے تھے، بیوہ کی شادی کا تصور تو دور اسے زندگی بھر ہر آسائش ورنگینی کو اپنے اوپر حرام کرنا پڑتا بلکہ بیوگی کے بعد اس کا سرمونڈھ دیا جاتا تاکہ وہ بدصورت نظر آئے، اسے اپنی مذہبی کتابیں پڑھنے یا ہاتھ لگانے کی اجازت بھی نہ تھی، آج بھی بنارس میں ایسی عورتوں کو دیکھا جاسکتا ہے۔ہندوؤں کے رہنما اور مصلح راجہ رام چندر رائے نے اپنی کوششوں سے ’’ستی‘‘ کی اس رسم کو ختم کروایا، پھر بھی آزاد ہندوستان میں ’’ستی‘‘ کے واقعات اکثر ہوجاتے ہیں، بیوہ عورت کو شوہر کی جائیداد میں حق اور لڑکیوں کو حق وراثت تین ساڑھے تین ہزار سال پرانے ہندو مذہب اور تہذیب کو ۱۹۳۸ء اور ۱۹۵۶ء میں کافی جدوجہد کے بعد فراہم ہوئے، جسے اسلام اور مسلمانوں کے اثرات سے تعبیر کیا جاتا ہے۔

اسلام کی آمد سے پہلے عرب میں بھی صنف نازک کی حالت بہتر نہیں تھی، لڑکی کے پیدا ہوتے ہی اسے زندہ درگور کردیا جاتا تھا، اسلام نے وحشیانہ اس رسم کو سختی کے ساتھ ختم کردیا، اہل عرب بے شمار شادیاں کرتے تھے، شوہر کے مرنے کے بعد بیویاں بھی ترکے کی طرح تقسیم ہوجاتیں، سوتیلی مائیں بیٹیوں کو مل جاتیں، شعر وشاعری میں صنف نازک کو رسوا کیا جاتا، ان کی سر عام تضحیک کی جاتی گویا معاشرہ میں عورتوں کی عزت واحترام کا کوئی تصور نہ تھا۔

اسلام جب طلوع ہوا تو اس کے سورج کی کرنیں دوسرے شعبوں کے ساتھ عورتوں کیلئے بھی سماجی اور اقتصادی مساوات کے حقوق کی روشنی لیکر نمودار ہوئیں، اہل اسلام نے اس پر عمل کرکے عورتوں کو نہ صرف عزت واحترام دیا بلکہ اس کی عفت عصمت کے محافظ بنے اور عورتوں کو وہ حقوق عطا کئے جن کا تصور بھی دوسری اقوام میں نہیں ملتا۔

کرسی پر نماز پڑھنا

بسم اللہ الرحمن الرحیم

(کرسی پر بیٹھ کر نماز)

آج کل کرسی پر نماز پڑھنا فیشن ہو گیا ہے بڑے بڑے شہروں میں تو باضابطہ کرسیاں اس طرح رکھی ہوتی ہیں گویاکہ ابھی کچھ مہمان آنے والے ہیں! اور اگر ذمہ دارانِ مسجد کرسیوں کا انتظام نہ کریں تو باضابطہ ہنگامہ کیا جاتاہے مشکل امرتو یہ ہے کہ بعض مسجدوں میں ایسی کرسیاں ہوتی ہیں کہ اس پر نقش ونگاری بھی ہوتی ہیں اور اسی کے ساتھ سامنے سجدہ کرنے کے لئے بینچ بھی ہوتی ہیں حالاں کہ یہ تمام چیزیں غیر ضروری ہیں فقہا نے اسکی کراہت نقل کیا ہے ۔

(کرسی پر نماز پڑھنا کس کے لئے جائز ہے )

اس سلسلہ میں وہ تما م تفصیلات پر ضرور دھیان رکھیں جس کا تذکرہ ہم اس پہلے شائع شدہ مضمون ’’فرض نمازمیں قیام کب معاف ہے‘‘ میں کر چکے ہیں نیز جو شخص قیام پر بالکل قادر نہ ہو تو اس کے لئے دربار نبوت سے بیٹھ کر رکوع اور سجدہ کے ساتھ نماز پڑھنے کا سبق ملا ہے اور اگر بیٹھ کر رکوع اورسجدہ کرنے پر قادر نہ ہو توبھی بیٹھ کر ہی نماز ادا کرے اور رکوع اور سجدہ سرکے شارہ سے اس طرح کرے کہ سجدہ کا اشارہ رکوع کے اشارہ سے زیادہ جھکاہواہو ۔

اللہ تعالیٰ کاارشاد ہے ’’فاذکرواللّٰہ قیاماً وَّقعوداً وّعلی جنوبکم‘‘ (النساء : ۱۰۳)

کہ اللہ تعالیٰ کا ذکر(نماز) کھڑے ہوکر ،بیٹھ کر،لیٹ کر اداکرو۔اس آیت کی تفسیر میں حضرت ضحاک ؒ فرماتے ہیں:

’’ھذابیان حال المریض فی اداء الصلوٰۃ بحسب الطاقۃ (المبسوط للسرخسی ۱/۲۱۲)

کہ اس آیت کریمہ میں مریض کی حالت بیان کی گئی ہے نماز اداکرنے کے سلسلے میں مریض کے طاقت کے موافق ۔ 

اور ابن مسعود کی روایت میں ہے ’’المراد ھذاالذکرالصلاۃ (المحیط البرھانی ۲/۱۴۱)کہ یہاں ذکر سے مراد نماز ہے ،چنانچہ آپ ﷺ کا فرمان ہے ’’عن عمران ابن حسین قال کان بی الناصورۃ فسألتُ النبی ﷺ عن الصلاۃ فقال صلِّ قائماً فان لم تستطیع فقاعداً فان لم تستیع فعلیٰ جنب‘‘(ابن ماجہ /۸۶)

حضر ت عمران ابن حسینؓ فرماتے ہیں کہ مجھے ناسور(بواسیر) کا عارضہ لاحق تھا میں نے آپ ﷺ سے نماز کے متعلق دریا فت کیا تو آپ ﷺ نے فرمایا :’’کھڑے ہوکر نماز پڑھو اگر اس کی طاقت نہ ہو تو بیٹھ کر (نماز) پڑھو اور اگر اس کی بھی طاقت نہ ہو تو کروٹ کے بل لیٹ کر نماز ادا کرلو‘‘۔

ایک دوسری روایت حضرت علیؓ سے ہے کہ آپ ﷺ نے بیمار کی نماز کے متعلق فرمایا : ’’ان لم یستطیع ان یسجد اومأَ وجعل سجودہٗ اخفض من رکوعہٖ‘‘ (بدائع الصنائع۱/۱۰۶)

یعنی اگر بیٹھ کر رکوع وسجود پر قادر نہ ہو تو پھر رکوع اورسجدہ (سر) کے اشارہ سے کرے اور سجدہ کااشارہ زیادہ پست کرے رکوع کے اشارہ سے۔

وان تعذرای الرکوع والسجود او مأ برأ سہٖ قاعداًوجعل سجود ۃ اخفض من رکوعہٖ ولا یر فع الیہ شئ للسجود(شرح وقایۃ ۱/ ۱۸۹)

اور (اگر بیٹھ کر نماز پڑھنے کی صورت میں )رکوع اور سجدہ کرنا مشکل ہو جائے تو (بھی) بیٹھ ہی کر اشارہ سے (رکوع اور سجدہ کر کے ) نماز ادا کرے اور سجدہ کو رکوع کے مقابلہ میں زیادہ پست کرے اور سجدہ کے واسطے کسی چیز کو نہ اٹھائے ۔

ویقعد کیف شاء فی الاصح (نور الایضاح : ۱۰۲)اور (بیمار کے لئے اختیار کہ ) وہ جس طرح چاہے بیٹھ جائے صحیح قول کے مطابق ۔

مذکورہ تمام آیت واحادیث اور فقہی عبارتوں سے حسب ذیل باتیں معلوم ہوئیں ،

(۱)کہ مریض اولاً کھڑے ہو کر نماز ادا کرے اگر قیا م پر بالکل قادر نہ ہو تو بیٹھ کرنماز ادا کرے ۔(۲) اور بیٹھ نے میں جس طرح سہولت ہو اسی طرح بیٹھ جائے کوئی مخصوص طریقہ پر بیٹھنا ضروری نہیں ہے ۔ 

(۳) بیٹھ کر نماز پڑھ نے کی صورت میں رکوع اورسجدہ کرے اگر اسکی قدرت نہ ہو تو پھر سر کے اشارہ سے رکوع اور سجدہ کرے ۔

(۴) سر کے اشارہ کو سجدہ کیلئے زیادہ جھکائے رکوع کے اشارہ سے۔

(۵) بیٹھ کر اگر رکوع اور سجدہ نہ کرسکتا ہو تو سجدہ کے لئے بینچ وغیرہ کا سامنے رکھنا درست نہیں ہے ۔ اس لئے کہ مریض کے لئے مسنون عمل یہی ہے کہ بیٹھ کر نماز ادا کرے ،اور رکوع اور سجدہ پر قدرت نہ ہو تو رکوع اور سجدہ کے لئے سر سے اشارہ کرے ۔

نیز کرسی پر بیٹھ کر نماز پڑھنے پرجہاں خود تشفی نہیں ہو تی ہے وہیں بلا ضرورت استعمال سے اتصالِ صفوف بھی برقرار نہیں رہتی ہے اور خلالِ صفوف بھی لازم آتاہے جبکہ اتصالِ صفوف اور عدمِ خلالِ صفوف کی احادیث میں بہت تاکید آئی ہے آپ ﷺ کا فرمان ہے 

ام المؤمنین حضرت عائشہؓ سے روایت ہے کہ رسول اللہ ﷺ نے فرمایا: ’’بیشک جس نے خالی جگہ کو پُر کیا اسکو اللہ تعالیٰ بلند مقام عطاکیااور فرشتے اس کے لئے دعاء مغفرت کرتے ہیں‘‘( ابن ماجہ باب اقامۃ الصفوف /۷۰)

حضرت ابو جحیفہؓ سے روایت کہ جس نے صف کے خالی جگہ کو پُر کیا اس کو بخش دیا گیا(مسندبزار شاملۃ ۰۱/۱۵۹)

عن انس بن مالک عن النبی ﷺ قال سوُّوا صفوفکم فانّ تسویۃ الصفوف من اقامۃ الصلٰوۃ (بخاری باب اقامۃ الصف من تمام الصلوٰۃ ۱/۱۰۰ )حضرت انس ابن مالکؓ آپ ﷺ سے روایت کرتے ہیں کہ آپ ﷺ نے فر مایا صفوں کو برابر کر وکیونکہ صفوں کو برابر کرنانماز کے درست کرنے کا جز ہے ۔

ہاں!اگر کوئی ایسا معذور ہو کہ اس کے لئے زمین پر کسی بھی ہیئت میں بیٹھنا دشوار ہو تو اس کے لئے کرسی پر بیٹھ کر نماز پڑھنا درست ہے ،اگر زمین پر بیٹھ نے کی استطاعت ہو تو پھر زمین پر بیٹھ کر رکوع اور سجدہ کے ساتھ نماز کا ادا کرنا ضروری،کرسی پر بیٹھ کر اشارہ سے رکوع اور سجدہ کرنا جائز نہیں اوراس صورت میں نماز بھی نہیں ہوگی ۔

جو شخص زمین پر بیٹھ کر رکوع اورسجدہ پر قادرہو اس کے لئے کرسی

جو شخص زمین پربیٹھ کر رکوع اورسجدہ پر قادرہو اس کے لئے کرسی پرنماز جائز نہیں۔وان عجز وقدر علی القعود فانہ یصلی المکتوبۃ قاعداً برکوع وسجود ولا یجزیہٖ غیر ذالک (فتاوی تاتار خانیہ ۲/ ۶۶۶۷)

(کرسی پر رکوع اور سجدہ کا صحیح طریقہ)

بعض حضرات کرسی پرنماز ادا کرتے وقت رکوع کے لئے اپنے ہاتھ کو ران پر رکھتے ہیں اور سجدہ کرتے وقت ہاتھ کو فضا میں معلق کرتے ہیں اس طرح کرنا ثابت نہیں ہے رکوع اور سجدہ دونوں میں اپنے ہاتھ کو ران پر رکھے بس سجدہ میں سر رکوع کے مقابلہ میں زیادہ جھکادے ۔

(رکوع اور سجدہ میں پیچھے کے حصہ کواٹھانا)

خواہ زمین پر بیٹھ کر نماز پڑھ رہاہو یا کرسی پر بیٹھ کر ،رکوع اور سجدہ میں سرین کا اٹھنا ضروری نہیں ہے بس سر کو گھٹنے کے برابر میں کر دے اور سجدہ میں اس سے کچھ زیادہ جھک جائے جیساکی امداد الاحکام میں ہے، ’’ بحالت جلوس رکوع کرتے ہوئے صرف اتنا ضروری ہے کہ پیشانی کو گھٹنے کے مقابل کر دیاجائے اس سے زیادہ جھکنے کی ضرورت نہیں، نہ سرین اٹھانے کی ضرورت ہے ۔

‘‘(امدادالاحکام ۱/۶۰۹)

(ٹیبل یابینچ پرسجدہ کرنا)

بعض مسجدوں میں ایسی کرسیاں بنی ہوتی ہیں کہ اس کے سامنے ٹیبل وغیرہ بھی لگا ہو تا ہے اور کرسی پر نماز پڑھنے والے اسی پر سجدہ کرتے ہیں اس طرح کرنا مکروہ ہے، سجدہ کے لئے بس سر سے اشارہ کردے ۔حضرت جابرؓ سے روایت ہے کہ آپ ﷺ نے فرمایا ’’ ان قدرت ان تسجد علی الارض فاسجد والاّ فاومی برأسک(البزار بحوالہ البنایۃ شرح الھدایۃ ۲/۶۳۷)کہ اگر تم قدرت رکھتے ہو زمین پر سجدہ کرنے کی تو سجدہ کر و،ورنہ پھر سر کے اشارہ سے سجدہ کرو۔

یہی روایت بیہقی نے معرفہ میں حضرت جابرؓ سے تخریج کی ہے اس میں ہے کہ آپ ﷺ ایک بیمار کی عیادت کرنے گئے ،آپ ﷺ نے دیکھا کہ وہ سجدہ تکیہ پر کر رہا ہے آپ ﷺ نے تکیہ اٹھاکر پھیک دیا اور فرمایا’’ اگر تم قدرت رکھتے ہو زمین پر سجدہ کرنے کی تو سجدہ کر ورنہ پھر سرکے اشارہ سے سجدہ کرو‘‘۔ (مختصر من الحدیث الجابرانظر البنایۃ شرح الھدایۃ ۲/۶۳۷)

فائدہ:غور کریں کہ جب حضور ﷺ نے تکیہ پر سجدہ کرنے کو ناپسند کر کے تکیہ پھینک دیا پھر بینچ وغیرہ پر سجدہ کیوں کرگوارا ہو سکتا ہے ؟ 

مجددزمانہ حضرت مولانا اشرف علی تھانوی ؒ فرماتے ہیں : 

’’سجدہ کرنے کے لئے تکیہ وغیرہ کوئی اونچی چیز رکھ لینا اور اس پر سجدہ کرنا بہتر نہیں ،جب سجدہ کی قدرت نہ ہوتو بس اشارہ کر لیا جائے ، تکیہ پر سجدہ کرنے کی ضرورت نہیں‘‘(بہشتی زیور : بیماروں کی نماز)

(ہاتھ اور آنکھ کی اشارہ کااعتبار نہیں)

رکوع اور سجدہ میں سر کے اشارہ کا اعتبار ہے، کہ فقط ہاتھ، آنکھ ، دل کے اشارہ کا اعتبارنہیں۔ولم یؤم بعینہ وقلبہ وحاجبہٖ(نورالایضاح :۱۰۵)

کہ آنکھ ،دل اور آبرو سے اشارہ نہ کرے۔

(سجدہ کے اشارہ میں رکو ع کے اشارہ سے کم جھکاتو ؟)

سجدہ کے اشارہ میں رکو ع کے اشارہ سے کم جھکاتونماز نہیں ہو گی ۔نورالایضاح میں ہے ’’فان لم یخفضہ عنہ لا تصح‘‘ (نورالایضاح :۱۰۴)اگر سجدہ کے اشارہ کو رکوع کے اشارہ سے زیادہ نہیں جھکایا تو سجدہ نہیں ہو گا

(کرسی یازمین پر بیٹھنے کی ہےئت)

صاحب عذر کیلئے کسی خاص انداز میں بیٹھ نالازم نہیں ہے جس طرح آسانی ہو اس طرح بیٹھ جا ئے !کیونکہ کسی ہیئت کی قید مریض کے لئے مناسب نہیں اورقید کی صورت میں مریض کو ایک طرح کی تکلیف بھی ہے،چنانچہ صاحب مجمع نے خلاصہ سے قیدکا قول نقل کر نے کے بعد رقم طراز ہیں ؛’’ولا یخفیٰ انّ الایسر عدم تقیید بکیفیۃ من الکیفیّات لان عذر المریض اسقط عنہ الارکان فلان تسقط عنہ الھیئات اولیٰ (مجمع الانھر شرح ملتقی الابحر ۱/۱۵۴)

اوریہ بات مخفی نہیں کہ آسانی (بیٹھ نے کی ) کیفیتوں میں سے کسی کیفیت کے ساتھ مقید نہ کرنا ہے ؛کیو نکہ جب مریض کے عذرنے صاحب مرض سے رکن کو ساقط کردیا تو بدرجہ اولیٰ کسی مخصوص ہیئت کو ساقط کر دیگا ۔

( کرسی کیسی ہو؟)

بلا ضرورت کرسیوں کی کثرت نہ ہو جس وہ شادی خانہ یا محفلِ تقریبات معلوم ہو۔ اوربوقت ضرورت کرسی پر نماز پڑھنا ہو تو ٹیبل نما کرسی استعمال نہ کریں ، بس کرسی سیدھی سادی ہو جونقش ونگاری سے پاک ہو ۔

(کرسی صف میں کیسے رکھے؟ )

کرسی کو صف میں اس طرح رکھا جائے کہ کرسی کے پچھلے پاؤں مصلّیوں کے برابر میں ہوں اس سے پیچھے نہ کیا جائے ورنہ پچھلی صف کے نمازی کودورانِ سجدہ تکلیف ہوگی۔

(کرسی پر نماز پڑھنے والے صف میں کہاں بیٹھے؟)

بعض حضرات اوّلاًاپنی کرسی کو صف کے کنارے رکھ دیتے ہیں اور وہیں سے نماز میں شریک ہو جاتے ہیں خواہ آگے کی صف یاخود اسکی صف خالی ر ہے اس کی پرواہ نہیں کرتے غالباً وہ یہ سمجھ تے ہیں کہ اس کی کرسی درمیان صف میں آنے کی وجہ سے اچھا معلوم نہ ہوگا ،حالانکہ وہ بھول جاتے ہیں کہ صف کے درمیان میں جگہ چھوڑنے کی ممانعت احادیث میں آئی ہے اور تنہاں کھڑے ہونے کی بھی ممانعت آئی ہے اسی وجہ سے فقہاء نے صف کے درمیان میں جگہ چھوڑنے کو اور تنہاں کھڑے ہونے کو مکروہ لکھاہے ،پس صاحب عذر اپنی کرسی کو صف جاری میں رکھ کر نماز پڑھے خواہ اس کی کرسی درمیانی صف میں آجائے یا آخری صف میں ،ہاں اگر دوسرے مصلی پہلے سے موجود ہوں تو پہلے ان حضرات کو کھڑے ہو نے دیں پھر اپنی کرسی لگا کر نماز ادا کر لیں ۔

( دوران صلوٰۃمریض صحت یاب ہو گیا)

کرسی پر اشارہ سے نماز پڑھنے والا اتنا صحت یاب ہو گیا جس سے بیٹھ کر رکوع اور سجدہ کے ساتھ نماز ادا کر سکتا ہے تو اب بیٹھ کر ازسرے نو نماز پڑھے ،اور قیام وقعود کے ساتھ نماز پڑھنے والے کے مرض میں اس قدر اضافہ ہو گیا کہ بیٹھ کر کسی طرح نماز نہیں پڑھ سکتا ہے ،البتہ کرسی پرپڑھ سکتاہو تو کرسی پرنماز کوپوری کرے اس صورت میں از سرے نو نماز پڑھنے کی ضرورت نہیں۔چنانچہ علامہ شرنبلالی ؒ فرماتے ہیں :وان عرض لہ مرض یتمھا بماقدر ولوبالایماء فی المشہور ولو صلی قاعدا یرکع ویسجد فصح بنیٰولو کان مؤمیا لا(نورالایضاح :۱۰۵)

یعنی کھڑے ہوکر نماز پڑھنے والے کومرض پیش آیا تو بیٹھ کر جس طرح قدرت ہو نماز کو پوری کرے اگرچہ اشارہ سے ہو (اسی طرح ) بیٹھ کر نماز رکوع اور سجدہ سے پڑھ رہاہو پھر صحت یاب ہو گیا تو پڑھی ہوئی نماز پر بنا کرلے (ازسرے نو پڑھنے کی ضرورت نہیں) اور اگر پہلے سے اشارہ سے نماز پڑھ رہاہو (پھر اچھا ہو گیا ) تو اب اس پر بنا نہیں کر سکتے (اب از سرے نو نماز پڑھے)۔

(نفل نماز کرسی پر اشارہ سے)

نفل نماز میں قیا م افضل ہے ،فرض نہیں لیکن سجدہ تو فرض ہے اب بوجہ عذر نفل کرسی پر اشارہ سے پڑھا تو جائز ہے ،اوربلاعذر تارک سجدہ کی وجہ سے نماز نہیں ہوگی ۔ولوصلّی التطوع باالایماء من غیر عذر لایجوزُ(فتاویٰ عالمگیری ) 

(لمحہ فکر) 

اب کرسیوں پر نماز ادا کرنے والے حضرات خود اپنے اپنے احوال کا جائزہ لے لیں کہ کیا وہ واقعتا اس درجہ کا مریض ہے کہ شرعاً اس کے لئے کرسی پر نماز جائز ہو ؟ اگر وہ اس درجہ مجبور نہیں ہے تو پھر کرسیوں پر نماز پڑھنے سے احتراج کریں۔

اقوال فقہاء کی روشنی میں اس ناکارہ کے نزدیک وہ نمازیں جو قیام وقعودکے ساتھ رکوع وسجدہ پرقدرت کے با وجود کرسی پر اشارہ سے نماز پڑھی گئی ہیں ان کا اعادہ کرنا ضروری ہے اس لئے کہ تما م متون وشروح متفق ہیں کہ جو شخص بیٹھ کر رکوع اور سجدہ کے ساتھ نماز ادا کرسکتا ہو اس کے لئے بیٹھ کر رکوع اور سجدہ کے ساتھ نماز کا پڑھنا فرض ہے اور تارکِ فرض کی نماز نہیں ہوتی ۔

واللہ اعلم بالصواب

بہت ہی اہم دوسرے مضامین

نماز کے شرائطوفرائظ

نماز میں قیام کب معاف ہے

ملک بھارت کے سگتے مسائل

یکساں سول کوڈ

سول کوڈ اور ملک بھارت

سول کوڈ

فرض نمازمیں قیام کب معاف ہے

بسم اللہ الرحمن الرحیم

(قیام کی اہمیت اور ہماری کوتاہی)

بعض حضرات ایسے بھی ہوتے ہیں جو دوسروں سے بات چیت کرتے وقت دس دس منٹ کھڑے رہتے ہیں اور نماز پڑھتے وقت سرے سے بیٹھ کرہی نماز پڑھتے ہیں اس صورت میں قیام اور سجدہ پر قدرت ہونے کی وجہ سے اس کی نماز ہی نہیں ہو تی،اور بعض تو معمولی بخار ،نزلہ اور ہلکی تکلیف سے بیٹھ کر نماز پڑھنا شروع کر دیتے ہیں اس صورت میں اور بالخصوص کرسی پر وہ بھی اشارہ سے رکوع وسجدہ کرتے ہوئے فساد نماز کا باعث ہے،جبکہ فقہاء نے یہاں تک لکھاہے کہ اگر کوئی شخص صرف اتنی دیر کھڑے ہونے کی طاقت رکھتا ہو جتنے دیر میں تکبیر تحریمہ کہہ سکیں تو اس پر کھڑا ہو کر تکبیر تحریمہ کہنا ضروری ہے۔

وان قدر علی بعض القیام ولو متکئاً علی عصا او حائط قام لزوماً بقدر مایقدر ولو قدر آےۃ او تکبیرۃ علی المذھب لان البعض معتبر بالکل (در مختار مع الشامی ۲ /۹۷ وکذا فی مراقی الفلاح ۱/۱۶۶وکذا فی الجوھرۃ النیرۃ علی مختصر القدوری ۱/۷۹)

اگر کوئی قیام کے کچھ حصہ پر قادر ہواگر چہ لاٹھی پر ٹیک لگاکر یا دیوار سے ٹیک لگاکر تو کھڑا ہونا ضروری ہے اتنی دیرجتنی دیر کھڑاہو سکتاہو ،اگر چہ ایک آیت کے بقدر ہو یاتکبیر تحریمہ کے بقدر صحیح مذہب کے مطابق اس لئے کہ بعض کا اعتبار کل کے ساتھ ہوتا ہے ۔

قدر المریض علی بعض القیام قام بقدرہٖ ۔

(الاشباہ و النظائر۱ /۱۴۱ وکذا فی مجمع الانھرشرح ملتقی الابحر ۱/۱۵۴) 

یعنی مریض جتنا کھڑا ہو سکتا ہو اتنا کھڑاہو۔

چنانچہ حضرت مولانامفتی سید عبد الرحیم صاحب لاجپوری ؒ فرماتے ہیں: ’’فرض اور واجب نماز میں قیام فرض ہے پوری رکعت کھڑے ہوکر نہیں پڑھ سکتاہو تو تکبیر تحریمہ کھڑے ہو کر کہیں ،سہارے کے بغیر کھڑے نہ ہو سکیں تو دیوار یا عصا کا سہارابھی لے لیں ، اپنے خادم کا سہارالے سکتے ہیں ،خلاصہ یہ ہے کہ تکبیر تحریمہ کہکر ایک آیت ہی کسی طرح پڑھ سکتے ہیں تو اتنی مقدار ضرور کھڑے ہوں ،اتنی بھی طاقت نہ ہویاخطرہ ہو کہ مرض میں شدت ہو جائیگی تو بیٹھ کر پڑھنے کی اجازت ہو گی ،اسی طرح بیٹھنے کے متعلق بھی ہے تکیہ لگا کر یاکسی صورت سے بیٹھ سکتے ہو تو لیٹ کر نماز نہیں ہوگی ،جب بیٹھ کر پڑھنے کی کوئی صورت نہ رہے تو لیٹ کر پڑھ سکتے ہیں ۔فرض واجب اور صبح کی سنتوں کا یہی حکم ہے ، البتہ نفل بلا عذر بھی بیٹھ کر پڑھ سکتے ہیں لیکن نصف اجر ملے گا ‘‘ (فتاویٰ رحیمیہ ۳/۵۵)

******

(وہ اعذار جس کی وجہ سے قیام ساقط ہو جاتاہے )

(۱)جب بالکلیہ کھڑے ہونے پر قادر نہ ہو، نہ تو از خود اور نہ دیوار وغیرہ کا سہارا لیکر (اگر اتنی دیر کھڑا ہو سکتا ہو جس میں تکبیر تحریمہ کہہ سکتاہو تو کھڑے ہو کر تکبیر تحریمہ کا کہنا فرض ہوگا اگر اس نے سرے سے بیٹھ کر ہی نماز ادا کی تو اس کی نماز نہیں ہو گی )

(۲) کھڑے ہونے پر قادر تو ہو لیکن رکوع اور سجدہ پر قادر نہ ہویا صرف سجدہ کرنے پر قادر نہ ہو تو ایسے حضرات کے لئے بھی قیام کی فرضیت ساقط ہے انکو اختیار ہے کھڑے ہو کر پڑھے یا بیٹھ کر ، البتہ بیٹھ کر پڑھنا زیادہ بہتر ہے ۔

(۳) کھڑے ہونے میں یا سجدہ کرنے میں زخم بہتا ہو ،

(۴)کھڑے ہونے میں پیشاب کا قطرہ گرتاہو ۔

(۵)کپڑا اتنا کم ہو کہ کھڑے ہو کر نماز پڑھنے سے ستر کھل جاتاہو۔ 

(۶) کھڑے ہو کر نماز پڑھنے سے قرائت پر قادر نہ ہو اور بیٹھ کر نماز پڑھنے سے قرائت پر قادر ہو ۔

(۷)کھڑے ہو کر نماز پڑھنے سے ناقابل برداشت تکلیف ہوتی ہو یا حاذق مسلمان حکیم کے قول کے مطابق مرض کے بڑھ جانے یا دیر سے ٹھیک ہو نے کا یقین ہو۔ 

( بدائع الصنائع۱/۱۰۵ والبحر الرائق۱/۳۰۸ وملتقی الابحر۱/۲۲۹)

اسی جیسی دوسرے اہم مضامین 

۱ :نماز کے شرائط وفرائض

۲:نماز میں قیام کی فرضیت

ملک بھارت  کے سلگتے مسائل کے لئے نیچے کلک کریں

۱ : یکساں سول کوڈ

۲ :سول کوڈ اور ملک بھارت

۳ :سول کوڈ