بسم اللہ الرحمن الرحیم
مروجہ قرآن خوانی
آج کل جس طرح قرآن خوانی رائج ہو چکا ہے یہ سراسر بدعت اور ناجائز ہے اور اس پر اجرت لے لینا یہ تو قرآن پر اجرت لینا ہوا جسکی حرمت نصوص شرعیہ سے ثابت ہے نیزاس طرح قرآن پڑھنے والے کو ثواب نہیں ملتا جب پڑھنے والے کو ثواب نہیں ملتا تو مردوں کو کیسے ملے گا؟چنا نچہ اللہ تعالی کا ارشاد ہے: ولا تشترو اباٰیاتی ثمناقلیلا (البقرہ / ۴۱)ترجمہ : کہ مت لو بمقابلہ میرے احکام کے معاوضہ حقیرکو(ترجمہ تھانوی)
اب آئیے اور علامہ ابن عابدین کی عبارت ملاحظہ کریں :
فالحاصل انّماشاعت فی زماننا من قرأۃالاجزاء بالاجرۃلا یجوز لانّ فیہ الامر بالقرآۃواعطاء الثواب للآمروالقرأۃلاجل المال فاذالم یکن للقاری ثواب لعدم النّےۃالصحیحۃ فاین یصل الثواب الی المستأجرولو لا الاجرۃماقرأاحدلاحدفی ھذاالزمان بل جعلواالقرآن العظیم مکسباووسیلۃالجمع الدنیا انّاللّہ وانّاالیہ راجعون۔(شامی ۶ / ۵۶)
ترجمہ:حاصل یہ کہ ہمارے زمانے میں جو اجرت پر قرآن پاک پڑھنے کا جو رواج ہوگیا ہے یہ جائز نہیں ہے اس لئے کہ اس میں دوسروں کے کہنے پر قرآن کا پڑھنا اور مال کی وجہ سے قرآن کا پڑھنا ہے پس نیت کی خالص نہ ہونے کی وجہ سے جب پڑھنے والے کو خود ثوا ب نہیں ملتاتو پھر پڑھانے والے کو ثواب کیسے پہونچے گااگر (اس پڑھنے والے کو)اجرت نہ دیا جائے تو اس زمانے میں کو ئی کسی دوسرے کے لئے نہیں پڑھتا ہے بلکہ لوگوں نے قرآن عظیم کو کمانے اور دنیا جمع کرنے کا ذریعہ بنا لیا ہے انا للّہ وانّاالیہ راجعون
علامہ ابن عابدین شامی ؒ ہی کی ایک شاہکارتصنیف شفاء العلیل وبلّ الغلیل ہے جس میں آپ نے اجرت پرذکروتلاوت کے عدم جواز پر مفصل کلام کیا ہے چنانچہ ایک جگہ آپ ؒ فرماتے ہیں
ومن اھمّ مایؤمر بہ ان یّحذر کل الحذر من اتخاذالقراٰن معیشۃ یکتسب بھافقد جاء من عبد الرحمٰن بن شبلؓ قال :قال رسول اللہ ﷺ اقرؤالقراٰن ولا تأکلوبہ (مجموعہ رسائل ابن عابدین /۱۷۵)
اہم ترین حکم جس سے ہر حال میں بچنا ضروری ہے وہ یہ کہ قرآن کریم کو ذریعہ معاش بنانا ہے چنانچہ عبد الرحمن ابن شبلؓ سے مروی ہے کہ آپ ﷺ نے فر مایا :کہ قرآن پڑھو مگر اس کے بدلہ کھاؤنہیں ۔
حضرت مولانا رشید احمد گنگوہی ؒ فرماتے ہیں ’’اگر عرف میں یہ بات طے پا چکی کہ قرآن پڑھنے والے کو ضرور کچھ دیتے ہوں تو اگر پہلے سے باہمی اجرت پڑھنے قرآن مجید طے نہ ہوئی ہو تو بھی لینا جائز نہیں اور نہ ایسے پڑھنے پر ثواب میت کو پہنچتا ہے اور اگر دینا عرف کے اندر نہیں اور خالی نیت ہے لوجہ اللہ اس نے پڑھا پھر اگر لے لیوے تو کچھ حرج نہیں ‘‘(فتویٰ رشیدیہ کامل/۲۶۸)
حضرت مفتی اعظم محمود حسن گنگوہی ؒ فرماتے ہیں ’ ’آج کل بعض جگہ قرآن خوانی کر اکے ثواب پہنچانے کا طریقہ جو رائج ہو گیا ہے کہ مکان پر بلاکریا مسجد میں جمع کر کے ثواب پہنچایاجا تا ہے اور پڑھنے والے کو شیرینی،نقد،چائے کھانا ،کپڑااپنے اپنے رواج کے موافق دیتا ہے اور پڑھنے والے اس لا لچ میں جاتے ہیں اگر کچھ نہ دیا گیاتو نا خوش ہوتے ہیں اور اگر پہلے سے معلوم ہو جائے کہ کچھ نہیں ملے گا تو عذر کر دیتے ہیں اور بعض قاری ایک دن میں کئی کئی جگہ جاتے ہیں پھر آپس میں مقابلہ اور مفاخرہ کرتے ہیں کہ ہم نے اتنا کمایا گویاایک پیشہ کمائی کا بنا رکھا ہے اسکی ہر گز اجازت نہیں ‘‘۔ (فتاوی محمودیہ ۱۶ / ۳۰)
حضرت مفتی نظام الدین ؒ فر ماتے ہیں ’’اس طرح روپیہ لیکر ختم قرآن یا کوئی اور ختم کرنا اجرت لیکریہ اجارہ علی الطاعات میں داخل ہوجائیگا اور اس پر کوئی ثواب نہ ملے گا پھر ایصال ثواب کس چیز کا کریں گے ایصال تو ثواب کا ہو تا ہے (اوریہاں تو نیت خراب ہو نے کی وجہ سے خود پڑھنے والے کو ثواب نہیں ملا)(نظام الفتاویٰ جلد ۶ جز۲/۱۵۰)
اب آئیے اور حضرت مولانا پالن حقانی کی زبانی مروجہ فاتحہ خوانی کا جائزہ لیجیے فر ماتے ہیں ’’ایک مولوی صاحب تھے وہ فاتحہ پڑھنے کا پیسہ لیتے تھے تین قسم کا فاتحہ پڑھتے تھے سوا روپئے والا،سوا پانچ روپیہ والا، سوا دس روپیہ والایہ بات ہمارے بپچپن کی ہے ان فاتحہ پڑھنے والوں کو ہم نے دیکھا ہے سوا روپیہ والا فاتحہ میں ایک سورہ فاتحہ اور تین (مرتبہ)سورہ اخلاص پڑھتے تھے اور سوا پانچ روپیے والے فاتحہ میں سورہ فاتحہ اور الم تر کیف سے لیکر سورہ ناس تک پڑھتے تھے،سوادس روپیے والے فاتحہ میں سورہ فاتحہ کے بعدسورہ یسٓن یا سورہ تبارک بڑی بڑی سورہ پڑھتے تھے‘‘(تقاریر حقانی۲/۲۵۰)
دیکھا آپنے فاتحہ کرنے کا طریقہ ؟اس صورت میں کس طرح میت کو ثواب ملے گا؟جبکہ نصوص شرعیہ اور عبارات فقہا ء متفقہ فیصلہ کررہی ہے کہ اس طرح قرآن پڑھنا اور پڑھوانا دونوں حرام وناجائز ہے
فتاویٰ عبد الحی میں ہے’’تسبیح وتہلیل وتلاوت قرآن اور زیارۃ قبور وغیرہ پراجرت لینا اور دینا دونوں صحیح نہیں‘‘پھراس کے بعد حضرت نے تائید میں فتاویٰ حامدیہ اور فتاویٰ ولوالجیہ کی صریح عبارت کو نقل کیا ہے(فتاویٰ عبد الحی کامل مبوب/۴۸۲)
حضرت مفتی عبد الرحیم صاحب لاجپوری ؒ فرماتے ہیں’’یہ تو نفس قرآن خوانی کا حکم ہے جس کے ساتھ خلاف سنت اہتمام ،اور دعوتی التزام برادری رسم ورواج کی پابندی اور بد نامی کا ڈروغیرہ خرابیاں شامل نہ ہوں ورنہ یہ رسمی قرآن خوانی ثواب کے بدلہ عذاب کا سبب بن سکتی ہیں جب لوجہ اللہ نہ ہونے کی وجہ سے خود ہی مستحقِ ثواب نہیں بنتاتو میت کو کیا بخش دیگا؟ ‘‘(فتویٰ رحیمیہ۱/۳۹۱)
نیز فتویٰ دارالعلوم میں ہے’’اجرت معروفہ یامشروطہ پر جوقرآن کریم میت کے لئے پڑھواتے ہیں اس میں محققین نے لکھا ہے کہ ثواب نہیں پہونچتا کیو نکہ جب پڑھنے والے کو ثواب نہ ہوا بوجہ نیت اجر عوض کے تو میت کو کہاں سے پہونچے گا البتہ کوئی شخص للّٰہ قرآن شریف پڑھکر میت کو پہو نچادے تو ان شاء اللہ تعالی اس کا ثواب میت کو ملے گا،خو۱ہ مکان پر پڑھ کر ثواب پہونچایاجائے یاقبر پر‘‘(فتویٰ دارالعلوم۵/۳۵ ۴)
اور یہاں یہ بات بھی نہیں ہے کہ یہ صرف علماء دیوبند ہی کا موقف ہو بلکہ تمام محدثین وفقہاء اس با ت پر متفق ہیں کہ اس طرح قرآن پڑھنا اورپڑھوانا حرام ہے ۔
آئیے مولانا احمد رضاخاں صاحب بریلوی کا فتویٰ مروجہ قرآن خوانی کے سلسہ میں کیا ہے اس کو بھی دیکھ لیتے ہیں۔
ایک استفتاء کے جواب میں فرماتے ہیں’’جب کہ ان میں معہود ومعروف یہی لینا دینا ہے تو یہ اجرت پرپڑھنا اور پڑھوانا ہوافانّ المعروف عرفاََ کا المشروط لفظاََ اور تلاوت قرآن اور ذکر الہی پر اجرت لینا اور دینا دونوں حرام ہے لینے والے اور دینے والے دونوں گنہگار ہو تے ہیں کما حققہ فی رد المحتاروشفاع العلیل وغیرھما اور جب فعل حرام کے مرتکب ہیں تو ثواب کس چیز کا اموات کو بھیجے گا؟۔۔۔(فتای رضویہ ۹/۱۶۸)
ان تمام عبارتوں سے معلوم ہوا کہ قرآن پڑھ کر اجرت لیناچاہے روپیے کی شکل میں ہو یاکھانے کی شکل میں یا کپڑے وغیرہ کی شکل میں یہ حرام و ناجائز ہے اور اس طرح قرآن پڑھنے والے کو خود ثواب نہیں ملتا ہے تو میت کو کیسے ملے گا ؟بلکہ اس طرح قرآن پڑھنے اورپڑھانے والے دونوں گنہگار ہو تے ہیں اس لئے اس عمل قبیح سے بچنا بہت ضروری ہے کہ آج عوام جس عمل کو ثواب سمجھ کر کررہی ہے حقیقت میں وہ عمل ذریعہ عذاب ہے، اگر لوجہ اللہ قرآن پڑھنے والا نہ ملے توخود جتنا ہو اتنا پڑھ کر میت کو ثواب پہنچادے ۔
اس سلسلے میں ایک سوال عموما کیا جاتاہے کہ اگر قرآن پڑھنے والے نے نہ تو اجرت کا مطالبہ کیا اور نہ پڑھانے والے نے کوئی تذکرہ کیا بلکہ خود اپنی جانب سے کچھ پڑھنے والے کو دیدے یا کچھ کھلا دے تو کیا یہ صورت جائز ہے ؟
یہ صورت بھی بالکل حرام وناجائز ہے اگر چہ پڑھنے سے قبل یا بعد میں کوئی لینے دینے کا تذکرہ نہ ہوا پھر بھی لینا دینا جائز نہیں اور اگرکچھ لے لیا یا کچھ کھا لیا تو اب بجا ے ثواب کے عذاب ہو گا کیونکہ عرف میں لینا دینا یا کچھ کھانا بالکل عام ہو چکا ہے پڑھنے والا بھی سمجھ تا ہے کہ کچھ ملے گا اور پڑھا نے والا بھی سمجھ تا ہے کہ کچھ دینا پڑیگا اور فقہ کا مشہور قاعدہ ہے’’ المعروف کاالمشروط‘‘اس لئے اگر چہ کوئی تذکرہ نہ ہو پھر بھی عرف عام کی وجہ سے اجرت کا حکم لگے گا اور اس کا لینا یا کھانا جائز نہیں ہو گا ۔ چنانچہ حضرت مفتی اعظم محمود حسن گنگو ہی ؒ سے دریافت کیا گیا کہ اگر صاحب خانہ اخلاقاچائے وغیرہ پیش کریں تو اس کا پینا اورقرآن پڑھنا کیسا ہے ؟
آپ ؒ جوا ب دیتے ہیں (اس طرح ) اختتام پر چائے وغیرہ پیش کرنا صورتامعاوضہ ہے اس سے بچنا چاہیے(فتوی محمودیہ جزدوم)
حضرت مولانا رشید احمد گنگوہی ؒ فرماتے ہیں ’’اگر عرف میں یہ بات طے پا چکی کہ قرآن پڑھنے والے کو ضرور کچھ دیتے ہوں تو اگر پہلے سے باہمی اجرت پڑھنے قرآن مجید طے نہ ہوئی ہو تو بھی لینا جائز نہیں اور نہ ایسے پڑھنے کو ثواب میت کو پہنچتا ہے اوراگر دینا عرف کے اندر نہیں اور خالی نیت ہے لوجہ اللہ اس نے پڑھا پھر اگر لے لیوے تو کچھ حرج نہیں ‘‘(فتویٰ رشیدیہ کامل/۲۶۸)
اللہ تعالیٰ امت سے ان تمام جہالت کو دور کرکے تمام مرحومین کو جنت الفردوس میں اعلیٰ سے اعلیٰ مقام عطا کرے ۔ آمین
